Los bolos cabreireses

El bolu cabreirés yía una derivación del xuegu chamáu “Bolu Celta”. A esti tipu de xuegu cuñózse-ye cuno nome xenéricu de pasabolu, yá qu’amás de la precisión necesaria n’outru tipu de bolus, cumu’l bolu palma ou la cuatriada, yía necesaria una gran fuercia, yá que las máximas puntuaciones nun se consiguen pur tumbar el bolu, senóu pur llanzar lus bolus lu más lluenxe ou altu posible.

Pa xugar al bolu Cabreirés precísase d’un campu más ou menos pranu de siquiera diez metrus d’anchu y trenta de llargu, nueve bolus de carbayu d’unys 8 centímetrus de grosez y 12 centímetrus de llargura, una bola redonda de rayíz de carbayu ou ancina que se pueda garrar cun una manu y una piedra prana y dura chamada “xugadeiru” onde se ponen lus bolus en llínea pa encomenzar la tirada. Pa mantener lus bolus en pía sobre’l xugadeiru suélense pegar cun buesta de vaca y tanto lus bolus cumu la bola métense nún cubu cun agua p’aumentar el sou pesu y evitar que se ruempan.

No campu de xuegu facen duas llíneas pa sumar lus puntus, la primeira está a unus 25 metrus del puntu de llanzamientu y la segunda está a unus 32 metrus, puntuando’l dobre lus bolus que no intre del llanzamientu crucien esta postreira, siendo condición indispensable pa puntuar que la bola pase la primer llínea dafeitu, nun facelu supón que nun se llogre nengún puntu pur bien lluenxe que foran parar lus bolus. A esta acción chámase-ye “cochare”. Lus bolus que nun crucien dafeitu una llínea puntúan cumu se quedaran na zona anteriore.

Estas dimensiones tamién varian en función de cada puebru, peru suelen ser casi tódalas mirmas. Pa xugar una partida facen dous equipus de dous, tres ou cuatru xugadores cada unu d’eillus. Al principiar la partida sortéase quién comienza (“la manu”), yá que’l primeiru tien la ventaya de qu’al chegar a sesenta tantus remata la partida y puede tirar una vuelta más.

Pa evitar esta ventaya, despuéis de tirar dambus equipus, el que nun tien la manu puede consiguila nuna acción que se chama “resboliare”, consistente n’intentar tirar siquiera unu de lus tres bolus que se ponen no xugadeiru llanzando la bola desde la primer llínea. Se lu consigue principiará tirando antias na siguiente tirada. Lus tantus cúntanse de la siguiente maneira:

  • 9 puntus pur pasar la bola de la primeira llínea.
  • 18 puntus pur pasar 1 bolu y la bola de la primeira llínea.
  • 27 puntus pur pasar 2 bolus y la bola de la primeira llínea.
  • 35 puntus pur pasar 3 bolus y la bola de la primeira llínea.
  • 45 puntus pur pasar 2 bolus y la bola de la primeira llínea y un bolu de la segunda.

 

La billarda, bigarda ou bigarcia

Pa xugar a la billarda precisábanse dous palus de madeira, unu chamáu Billarda d’un palmu de llargu aprosimáu qu’estaba afiláu pulus dous cabeirus pa facilitar que s’alzara del suelu al da-ye un golpe, y outru d’un metru aprosimáu de llargura cuno que se golpia la billarda en faciéndola llevantar del suelu cun un golpe n’unu de lus sou estremus. Esti segundu palu tamién sirvía de midida pa cuntar lus puntus que tenia cada xugadore. El númaru de xugadores yía variable, pero a lo menos tienen de ser dous y caúnu tien de tener la sua Bigarda y el sou palu llanzadore. El terrenu de xuegu podía ser yerba, tierra… El xuegu consiste, cumo yá dixéramos en golpiare, desde un determináu llugare, el palu pequeiñu pur una de las suas puntas, depuéis cuno grande p’alzalo al aire y no aire, da-ye outra vez pa llanzalo lo más lluenxe posible.

Pa principiar el xuegu sorteábase quién principiaría y decidíase a cuántos puntos (“varas”) xugaríase la partida teniendo en cuenta’l tiempu de que se disponía. Decidíase’l llugar de salida poniendo una piedra prana purbaxo la billarda pa que quedara una de las suas puntas llevantada ou podía aproveitase dalgún foyu del terrenu cun cuenta de qu’houbiera un buecu entre’l suelu y una de las suas puntas p’asina facilitar que s’alzara al golpiala, cousa que yá nun asocedía una vez movida del llugar d’iniciu. 

El primer xugador principiaba a lo más cun tres intentos pa consiguir unviar la billarda a la mayor distancia posible, teniendo en cuenta que na primer vuelta que la billarda fora parar a una distancia mayor d’una vara del sitiu d’iniciu, el segundu xugador coyía esta y se yiera capaz de da-ye desde ende al palu que s’asitiaba no puntu de salida, quitába-ye’l turnu y encomenzaba a xugar él. Se nun-ye daba a la vara, el primer xugador tenia tres intentosp’allonxar la billarda del llugar en que cayera, despuéis de lo que calculaba la distancia y sigún el sou parecer pidía una cierta cantidá de “varas” que yiera la midida del palu con que se golpiaba. Se los demás xugadores estaban d’alcuerdu concedíanselu y se nun lo estaban tenía de midir cuno palu. En casu de pasase no sou pidimientu la sua puntuación yiera cero, principiando’l próximu xugador cuno sou turnu de xuegu.

No casu de que dalgún xugador consiguiera coyer la billarda no aire en siendo golpiada pur outru, axudicábase automáticamente la victoria. Se esto nun asocedía’l xuegu siguía pur turnus hasta que dalguién chegara al númaru de varas que s’alcordara de primeiras no xuegu.

 

La cocha

Esti xuegu yiera desenvueltu fundamentalmente no intre de tiempu no que que s’iba a la veceira cuno ganáu y nas oucasiones nas que la mocedá tenía oportunidá d’axuntase, pus onque nun esiste un númaru fixu de participantes pierde competitividá cun menos de cuatru.

Cuna navaya, cada participante fai un buracu no suelu pa que seya lo fondu y anchu necesariu pur que pueda soportar tiesu’l sou palu (caña de piornu ou outra madeira, cun una combadura llixeira, similar al stick d’hockey). Cada unu d’estos buracos está separáu pur unos 2,5 ou 3 metros d’outru central, peru ésti cun un diámetru que na midida d’aqueilla época yiera “l’anchu d’una gorra”.

Utilizando cualquiera de los mueitos sistemas pa facer el sortéu, escuéyese d’entre todos quién va a mano, pulo qu’esisten tantos buracos cumo xugadores menos unu. La distancia de la mano al buracu central establezse de común alcuerdu. El xugador agraciáu (el cocheiru) ponse na mano -entre 5 y 6 metros- provistu del sou palu y una cepa; la sua misión consiste en llanzar la bola y intentar metela no buracu grande, peru los que forman el círculu van tratare,  antias de que caiga al suelu, de sacala violentamente lo más lluenxe posible, dándo-ye un buen estacazu, cuno qu’el que sacóu va dase una soberana caminada pa recuperala. En casu de que naide llogre espulsala y efectivamente caiga dientro del buracu, esti xugador nun entra no siguiente sortéu pur qu’outru saque de nuevu.

Se la cepa nun entra, nin tampouco yía golpiada pur naide, tien de quedar no suelu sin que la puedan tocar los componentes del círculu, permaneciendo cada unu cuno sou palu taponando los buracos desde l’intre que la cepa toca la yerba, y hasta qu’el desafortunáu tirador s’achega pa comprobar cun plasmu, que nun yía precisamente al golf a lo que s’está xugándo nesti campu, yá que no intre que toca la pelota de madeira, una nube de palos descarga con toda la furia sobre eilla (y dacuando sobre los sous cadriles) nun deixando que siga la trayectoria contra la fuesa meta, pero nun queda la sua misión fracasada pur eillo, pus, se mientras los xugadores del círculu tratan d’enzancar la xugada de metela no buracu, el tirador llogra meter el sou palu en dalgún buracu, el propietariu del mirmu yía’l que tien de dir a tirare, siguiendo nuevamente la competición.

 

El cincote

Yía un xuegu al que xugaban lus rapaces, prencipalmente cuando diban guardar el ganáu.

Xugábase entre varias personas.

Facíase un círculu no suelu onde cada xugador fincaba un palu d’unus 60 cm de llargu y 2,5 de grosor. Cadagunu de lus participantes escoyía un llugar, nou muei lluenxe del círculu, que s’asiñalaba cun una marca especial, a la que chamaban “castiellu”. Facíase primeiru una preba pa fincar lus palus, y aquel que se quedaba meyor craváu escoyía vez. Outramiente, el qu’había quedáu más débil tenía de prencipiar el xuegu. Cada xugador cravaba’l sou palu, peru a partir del primeiru cadagunu procuraba, al empar que fincaba’l sou palu, tumbar el del contrariu. Cuando un xugador “esbarrumbaba” a un oponente, el restu de lus compañeirus alzábanse cumu xueces y indicaban hasta ónde diban cuntare; siempre del unu al cien.

Mientras aquestus xueces cuntaban la serie de númarus indicáu a lu primeiru, el vencedor cravaba cuno sou palu no castiellu del vencíu, procurando llevase cuantus más turrones meyor pa facer más grande’l suyu. El xuegu ganábalu el que llograra construyir más altu’l sou castiellu a consta de lus demás.

Cuando deixaban el xuegu, lus ganadores devolvían el material arrampuñáu a lus perdedores cubriendo lus buracus del suelu que primeiramente apicaran.  Y mientras cubrían estus canchiforcus apachacando la tierra cunus pías, cantaban:

«Eiquí tráncoute,

Cun puertas de fierru.

El que las abra.

Dirá al infiernu.»

 

Las tabas

Una taba nun yía más qu’un astrágalu, yía dicire, un güesín de las patas de las ouveyas, curdeiros y carneiros, que desde fa miles d’años s’empregóu pa xugare.

La taba tien cuatro posiciones distintas, cadaguna d’eillas tien un ñome distintu. En cada llugar esas posiciones reciben ñomes distintos. Onque n’outros llugares se xuega cun cinco tabas y hai xeitos bien distintos de facelo. De normal xugábase cun doce tabas y una “pita” (una piedrina qu’en dalgunos llugares chaman “pitón” ou “pitona”). Trátase d’un xuegu que solía practicase en cualesquier llugar chanu, xeneralmente nas puertas las casas, a l’abrigada, pero tamién no interior, cunas participantes de rodiellas ou sentadas no suelu.

Pa principiar cuéyense las doce tabas entre dambas manos y llánzanse. Al cayer al suelu van facelo cadaguna d’un llau y asina encomienza’l xuegu. Tírase la pita al aire y antias de recoyela, sin deixar que cayera al suelu, coyíase una taba del suelu y tamién la pita. Cumo yieran 12 tabas, había que tomar 3 en cadaguna de las posiciones señaladas y n’orden; en casu de que nun houbiera trés nuna determinada postura, facíase un llanzamientu pa dala la vuelta, coyiéndola no siguiente.

Cuando la pita cayía al suelu perdíase la vez y xugaba la siguiente rapaza. Tamién se perdía la vez cuando nun se recoyía nenguna taba ou ésta nun yiera de la posición correspondiente. Ganaba aqueilla participante que llograba recoyer las 12 tabas, dalgu que yiera muei dificultosu.

 

La garza

Yía un xuegu de llanzamientu y habilidá no que los xugadores (dous ou más), agachaos no suelu detrás d’una llínea, depositan no centru l’apuesta alcordada (unu ou varios cromos, cartones de las caxas de ceriellas, cachos de naipes debidamente recortaos y coloriaos, etc.) nuna área de xuegu alcordada.

N’outras épocas, las caxas de ceriellas valían cincu céntimos y disponían de trenta ceriellas cadaguna de las caxas. Vendíanse en dous formatos: unu senciellu que s’abría apretando pur un llau cun un deu; outru, parecíu a una cimbreira, que se zarraba namás pula presión de dous gomas pequerrinas. Esti modelu reproducía na sua tapa retratos, animales, paisaxes, etcétera… N’oucasiones nestas caxas facíase un buraquín na metá y ensertábase una cuerda piquiñina, consiguiendo sartas d’hasta mediu metru. Convertíanse en dineiru y apostábanse en mueitos xuegos.

Pintábase un círculu ou un cuadráu y no mediu poníase un númaru de cartones pur cada xugadore. Desde una llínea, a determinaos pasos, llanzábase una tanga que solía ser un tacón de goma de los ñuesos zapatos. Los “cartones”, qu’al golpe salían del círculu, yieran pal llanzadore.  Pa ver quién yiera’l primeiru en tirar desde detrás de los patacones, tirábase a una raya y el que más s’aprosimaba yiera’l primeiru.

 

La maya ou a esconderiellas

El xuegu de la Maya yía’l xuegu del escondite, xuegu universal en tódalas culturas y bien estendíu pur toda España. Suel recibir tamién outros ñomes cumo l’Escondite, las Escondías, etc., onque pur outru llau, estos xuegos nun son esactamente iguales a La Maya.

La Maya consiste n’escondese varios xugadores mientras outru d’eillos, cunos güeyos zarraos, está cuntando númaros, hasta una cantidá establecida. Una vez que termina de cuntare, trata de buscar y identificar a cadagunu de los xugadores qu’están escondíos. Cuando alcuentra y identifica a unu d’eillos, salen dambos corriendo contra’l llugar onse se cunta, denomináu Maya, y gana aquel que chegue antias.

La Maya yía un xuegu no qu’intervienen rapaces y/ou rapazas d’una edá d’hasta 14 años. De normal xuégase de día, ou bien, de ñueite, ganando en dificultá cuando se practica pula ñueite. El númaru de xugadores yía desde trés hasta los que se quiera, onque de normal yía alredor de diez xugadores.

Preparativos:

 Antias de principiar el xuegu escóyese entre los xugadores aquel que se va quedar a cuntare, mientras los demás escuéndense. Pa eillo, tiraban a suertes cun una china ou cun dalgunu de los cantares ou coplas típicas de la comarca:

 

«Pinto, pinto, lagarinto

Hecha las vacas al 25

Y los bueis al 26

Choro, Moro, Vergalloro

Pito redondo

Vete a esconder

 

Picu, picu, Zaramicu

quien te dióu esi llargu picu

me lu dióu Dious con su trabayu

Pa picar naquel carbayu

Rilla, rilla calabacilla

que na tua casa está Juanilla

Pique y repique un granto que saque

Lu lleve al molinu y todos a cumere.»

 

Del xugador que tien de cuntar dizse namás, y asina se-ye denomina pul restu de los xugadores, que yía’l que «se queda» (quédase cuna china y quédase a cuntare)… N’outros llugares usan outras espresiones cumo «la queda», «la liga», etc. Una vez escoyíu’l xugador que «se queda», escuéyese La Maya, que yía’l llugar onde, esti xugadore, va cuntar los númaros, mientras el restu de los xugadores s’escuenden alredor. La Maya tien de ser un sitiu eleváu del suelu pa poder cuntar de pías, y tien d’estar arrodiáu de mueitos sitios onde poder escondese los xugadores. Puede ser el muriu d’una parede, el tueru d’un árbol, una roca grande, etc.

El xugador que «se queda», ponese de cara a La Maya de brazos cruciaos a l’altura los güeyos, pa nun ver a los que s’escuenden, y apóyase cunos brazos na parede. Nesta posición principia a cuntar los númaros tan rápido cumo pueda y llevantando la voz lu suficiente pur que’l restu de los xugadores sepan por ónde va la cuenta y el tiempu que queda pa escondese. La cantidá a cuntar yía eigual al númaru de xugadores qu’intervienen no xuegu multiplicada por 10. Asina, se son 5, va cuntar hasta 50; se 6, hasta 60, etc. El xeitu de calcular esta cantidá, consiste en dir diciendo, cunas mirmas que se cunta, el númaru de xugadores: diez, venti, trenta, etc., hasta llegar el postreiru.

Desenvolvimientu del xuegu:

No momentu no qu’el xugador que se «queda» vuélvese contra La Maya y principia a cuntare, los demás xugadores salen corriendo a escondese al llugar que crean tien más dificultá pa ser alcontraos.

El tiempu que tienen los xugadores pa escondese yía’l tiempu que tarda’l que «se queda» en cuntar la cantidá establecida, más unos segundos de prórroga qu’emprega en terminar cun unos versos y dicir “Voi” bien alto por que todos lu oyan. Despuéis todos los xugadores tienen de quedase quietos no sou llugar d’escondite y el xugador que «se queda» encomienza la busca y identificación de todos y cadagunu de los xugadores escondíos. La táctica a siguir pur esti xugador na busca de los demás yía, separtase la mínima distancia del puntu onde se cunta p’asegurase la chegada a La Maya primeiru que’l restu de los xugadores.

Cuando un xugador yía alcontráu y identificáu, dambos xugadores, el que «se queda» y l’alcontráu, salen corriendo contra La Maya cuna mirma intención: chegar  primeiro que’l contrariu, porque’l que chegue antias va salvase. Nesti llance pueden dase los siguientes casos:

-Que chegue primeiro’l xugador que «se queda». Nestoncia, al chegar a La Maya golpea cuna palma la mano na mirma, diciendo: ¡Un, dos y trés por Fulanu! Cuno que’l xugador Fulanu va quedar na zona de La Maya hasta que remate’l xuegu y, se nun yía salváu pur outru compañeiru va pasar a ser el xugador que se «queda» no próximu xuegu.

-Que chegue primeiro’l xugador escondíu. Nestoncias, ésti, tien duas opciones al chegar a La Maya, una, llibrase a sigo mesmu diciendo al golpiar cuna mano na Maya: ¡Alzo La Maya por mi solo!, y outra, llibrase amás d’a sigo mesmu, a tódolos xugadores qu’estuvieran localizaos primeiro qu’él, diciendo nesti casu: ¡Alzo La Maya por mi y por todos mis compañeros! Nesti casu, tódolos xugadores van quedar llibres nesti xuegu y el xugador que «se queda» va siguir buscando al restu los xugadores qu’on s’atopen escondíos. El xuegu remata al resolvese’l llance del postreiru xugador escondíu.

 

La pionza

La pionza yía un xuguete de madeira, de forma cónica y rematáu nuna punta metálica, chamada rexu; sobre eilla enróllase un sogachu pa llanzalu y facelu beillare.

Las pionzas d’antias yieran fabricadas pulus mirmus rapaces, cun ou sin ayuda de mayores, cun madeira de sardón, que tallaban toscamente, poniéndo-yes finalmente un cravu de fierru sin cabeza cumu punta.

Pa evitar qu’el sogachu de la manu al llanzare, solía añudase no estremu un cachu de palu, una arandela ou, lu que yiera más corriente, una moneda de dous riales, aproveitando’l sou buracu pa facer el ñuedu.

Lus xeitus de xugar yieran bien diferentes. Básicamente tratábase siempre de tirar la pionza cuña cuerda y facela beillare. A partir d’ende había numarosas maneiras:

  1. Coyer el trompu cuña manu:

Lus xugadores llanzaban al mirmu tiempu las suas pionzas y no intre coyíanlus cuña manu, sin que deixara de beillare. Yiera toda una técnica consiguir qu’el trompu xubiera a la manu entre lus deus furabollus y corazón. Ganaba aquel xugador que’l sou trompu permaneciera más tiempu xirando.

  1. Sacar obxectos (caxas de cerillas, “perras”, canicas, pionzas, piedras…) primeiramente colocáus nún círculu ou cuadráu trazáu no suelu:

Marcábase un redondel d’unos dous metrus de diámetru onde no sou interior cada xugador colocaba l’obxectu que s’apostaba (pur exemplu una canica, una caxa de cerillas, inclusive una moneda). El primer xugador tiraba’l sou trompu y coyíalu cuña manu mientras beillaba. Despuéis, cun mueitu cueidáu y precisión tirábalu sobre lus obxectos colocáus no círculu, intentando sacalus d’él, pus ganaba tódolus que podía sacare. Mientras la pionza beillaba, el xugador podía tirar de ñuevu. Cuando se paraba, pasaba la vez al siguiente xugador y asina sucesivamente hasta que yá nun quedaba nada no círculu.

  1. Rompetrompus:

Tirar la pionza violentamente sobre la d’outrus intentando detener el sou beille. Una de las maneiras de xugar consistía en marcar un círculu no suelu y, pur veces, llanzar el trompu pur que beillara drentu. Mientras beillaba, el xugador intentaba sacalu cun l’ayuda del sogachu. Se lu consiguía nun pasaba nada, peru en casu contrariu tódolus demás llanzaban las suas pionzas contra él hasta que, pur efectu de dalgunu de lus porrazus que recibía, salía del círculu. Quedaba ñestoncias llibre y prencipiaba outra vuelta tirando’l siguiente xugadore.

 

La comba

El procedimientu yía bien simple: Sorteábase, qué rapazas son las que van facer dar vueltas a la cuerda, pur cualesquier de los procedimientos esistentes, y las dúas que perdían poníanse nos estremos de la mirma y daban. La cuerda trazaba una elipse que tocaba’l suelu llixeiramente nún movimientu rítmicu, y mientras, una ou más rapazas entraban y saltaban el mayor tiempu posible hasta fallare. Cuando esto asocede, el xugador qu’estaba saltando va mudar el papel a dalgún de los que dan a la cuerda.

Esistían mueitas variantes d’esti xuegu y dalgunas d’eillas diban acompañadas de cantares. En principiu namás se precisa d’una cuerda, que va tener distintas características dependiendo de la variante que quiera practicase:

  1. Comba Individual:

En cada estremu de la cuerda suelen ponese unos mangos de madeira ou plásticu que faciliten el movimientu rápidu de las muñecas al facer xirar la cuerda. Consiste namás en saltar la cuerda, lo que favorez la resistencia física del que la practica.

  1. Siguir al Rei ou “Cocherito Leré”:

Dous rapaces dan-ye a la comba. Los participantes pónense nuna ringuileira, estando’l primeiru al llau del que da. El primeiru yía “el Rei” y marca la pauta. Salta al interior de la cuerda, canta un cantar y sal. Cada llugar utiliza los sous propios cantares. El más cuñocíu yía “El cocherito leré”. Al siguiente xugador tóca-ye facer lo mirmo. Y asina sucesivamente. Se dalgunu de los participantes falla, esto yía, traba la cuerda ou s’equivoca no cantare, queda elimináu y yía sustituyíu pur unu de los que la facían rodare. El xugador va dir saltando y agachándose, esquivando la cuerda, al ritmu que marca’l cantare. Diz asina: “El cocherito leré, me dijo anoche leré, que si quería leré, montar en coche leré. Y yo le dije leré, con gran salero leré, no quiero el coche leré, que me mareo leré”. Cada vez que se pronuncia la palabra “leré”, las dúas personas qu’están dando a la comba llevantan la cuerda y trazan cun eilla un bucle no aire; el qu’está saltando va tener qu’agachase cun tal de nun s’enredar na cuerda.

No xuegu de comba chamáu “El cocherito leré”, el saltador tien de combinar el saltu cuna agachada pa nou trabar las evoluciones de la cuerda. A la fin del cantar sullitríase’l ñome de “María”, y despuéis de cada lletra fazse lo mirmo que cuando se canta “leré”. Considérase que, a partir de los siete años, los rapaces yá pueden sincronizar los sous movimientos al son de un cantare.

  1. A Pasar:

Los participantes van entrando pur velía na comba, saltan una vuelta y salen; terminan a midida que van fallando. Na segunda ronda saltan dúas veces, na terceira tres, y asina sucesivamente hasta que quede un solu participante saltando, que va ser el ganador.

  1. La Barca:

Nesta modalidá la comba balancíase d’un llau pal outru del suelu sin chegar a describir el círculu compretu. Los participantes, que terminan el xuegu pur fallar -ou “facen mala”, pa utilizar el llenguaxe propiu de la comba-, tienen d’entrar pur veces, esquivar la cuerda, saltando una ou varias veces, y salire. En cada ronda va xubise llixeramente l’altura de la cuerda, hasta que namás quede un saltadore, que va ganar la prueba.

  1. El Reló:

Un xugador sostien la cuerda pur un estremu y  ponse no centru d’un imaxinariu reló. Los demás van ponese en círculu alredor d’él, ocupando equitativamente distintas posiciones horarias en función del námeru de xugadores. Se son dolce, cadagunu va ocupar una hora. El xugador qu’esta no centru principia a facer xirar la cuerda ou aguya del reló pul suelu, aumentando progresivamente la velocidá. Los xugadores del círculu tienen de saltar al pasu de la cuerda; si la tocan quedan fora del xuegu. El postreiru yía’l ganadore.

 

El marru

Pa xugar al marru, disponse de dous equipos con cuatro ou seis xogadores cada un y, la esixencia mayor de tener una buena velocidá de carreira, yá qu’esti yiera un xuegu de pillar por equipos, había qu’evitar que pillasen a los xugadores del tou equipu y pillar a los máximos del outru equipu. Nesti xuegu, participan rapaces desde los 7 a los 13 años y necesítase un terrenu ampliu y abiertu pa poder correr. Pa poder xugar bien, necesítanse polo menos 4 xugadores por equipu, d’ehí p’alantre sin límite.

Fácense dous bandos y cadagunu marca no suelu una raya paralela a la de los dous oponentes, pero deixando entre dambas un espaciu considerable, que será la zona onde se desenvuelva el xuegu. Tras las rayas marcadas está el campo ou casa de cada bandu. Sal un de los xugadores al campu de naide y un del outru bandu tratará de toca-ye, lo que chamabamos “pica-ye” ou “arresta-ye”. Namás puede picar l’últimu que sal de l sua línea. 

Una vez arrestáu un rival, llévalu aql sou campu, onde queda presu. Cuando un bandu tien dalgún compañeiru presu tentará liberalu por tódolos medios. Pa conseguilo, dalgún d e los sous componentes tendrán de tocar al presu, pero, loxicamente, los rivales tentarán evitalo. Había que poner en xuegu distintas tácticas, así salían a la vez varios xugadores del sou campu ou casa, siguiendo distintas direcciones, tratando de distraer a los contrarios, reservándose un ou más pa tentar la liberación final. Cumo normalmente había varios prisioneiros, estos coyíanse polas manos formando una cadena en dirección al sou campu, asina facilitaban el llabor de los rescatadores y dificultaban la de los gardianes, al tener que defender más terrenu. Cuando conseguían tocar a un de los prisioneiros todos quedaban llibres y volvían rapidamente al sou campu. El xuegu dábase por concluído cuando un bando consigue apresar por completo al outro.

 

Bote boteiru

Yía un xuegu similar al yá descritu n’outra oucasión nesti llibru, La Maya, y podría considerase una variante d’aquél.

Esti xuegu consiste n’escondese varios xugadores mientras outru d’eillos va corriendo a recoyer un bote que foi llanzáu d’una patada lo más lluenxe posible por unu de los xugadores. Una vez que recueye’l bote y lu pon nun llugar especificáu, trata de buscar y identificar a cadagunu de los xugadores. Cuando esto asocede, salen dambos xugadores corriendo contra’l bote y gana  aquel  que cueya’l  bote antias (no casu del que se queda, ou-ye dea una patada’l qu’está escondíu).

El Bote yía un xuegu propiu de rapaces varones y edá cercana a los 15 años, por cuenta de ser  más violentu y más dinámicu qu’outros xuegos, cumo La Maya. Xuégase de día ou de ñueite, pero gana en dificultá cuando se xuega pola ñueite. El númaru de xugadores yía, eigual que na Maya, alredor  de diez.

Una vez escoyíu’l xugador que «se queda», márcase’l círculu no suelu y pónse’l bote drentu d’él.  Unu cualesquier de los xugadores péga-ye una patada y llánzalu en cualesquier dirección, lo más lluenxe posible.  Nesi intre, los xugadores salen corriendo a escondese, mientras el xugador que «se queda»  va corriendo a recoyer el bote y vuelve pa ponelu drentu’l círculu. Esti yía’l tiempu que tien el restu de los xugadores pa escondese, que cumo puede vese, yía muei inferior al utilizáu na Maya.

La táctica a siguir pol xugador que «Se queda»  p’alcontrar a los sous compañeiros yía la mirma que na Maya: sapártase la mínima distancia del bote, pa en casu de tener que salir  contra’l  bote, chegar el primeiru.

Cuando’l que «se queda» alcuentra y identifica a un  xugador, salen dambos corriendo contra’l bote y se chega primeiru’l que «se queda», toma’l bote na mano y da tres golpes con él no suelu, diciendo: ¡Bote boteiru por Fulanu!  Nesti casu, el xugador Fulanu quédase nas proximidades del bote esperando qu’outru xugador lu llibere. Se’l que chega primeiru yía’l xugador qu’estaba escondíu, ésti da una patada al  bote pa sapartalu del círculu (esti feitu chámase «dar   bote»), y conas mirmas diz:  ¡Bote!, llíbrase a sigo mirmu y a tódolos compañeiros que fueran alcontraos hasta esi momentu, qu’al  eigual qu’él se podrán volver esconder de ñuevu.

El xuegu termina al resolvese’l llance entre’l  xugador que «se queda» y el postreiru xugador escondíu.